Top 10

واليوم بيكون يوم مفضلاتي الـ١٠ لهذا الشهر تابعوا تحت ..

حاولت انوع فيهم عشان تستفيدون على وجه العموم ، ..

اول مفضلاتي لهذا الشهر سلة الترتيب تحطون فيها اغراضكم خفيفه و ماتاخذ مكان ، اخذتها من محل للكماليات ب ٢٥ ريال حطيت فيها الشامبوات واللوشنات والسكرابس ..

٢ـ تونر للبشره الحساسه من DermoViva بالبابونج والخزامى والخيار مهدئ للبشره وينظف وينعم ، ينظف البشره بشكل ماتتصورون حبيت اخذته من الصيدليه تقريبا بـ ١٠ ريال ..

٣-كريم Lipobase للترطيب العميق ينعم البشره ويعطيها نضاره ما اذكر كم سعره صراحه تلاقونه بالصيدليات يشبه لكريم QV لاكن بسعر اقل ، حلو للجفاف الشديد ..

٤-عطري المفضل من فكتوريا سيكرت ما اقدر اوصف لكم ريحته بس جميل جدا عموما الأذواق دائما تختلف بالعطور ممكن يعجبكم وممكن لا جربوا تروحون وتشمون ريحته اسمه Noir Tease..

٥- ماسك الشعر من Garnier Fructis المقوي مكون من ٣ زيوت ، زيت الزيتون و زيت الأفوكادو و الشيا للشعر الجاف والخشن ، انا الحمدالله شعري ناعم ولاكن استخدمه عشان الصبغه مجففه شعري يعطي لمعان وحيويه للشعر حبيته بس تحطونه لمدة دقيقه وتغسلونه ..

٦- ارواجي المفضله من Lime Crime 

Pansy and Red Velvet ..

٧- بيضة توني مولي القابضه للمسام حبيتها تنظف المسام وتصغره ، طبعا ينحط على المناطق الي فيها مسام بس تخلونه من ١٠-١٥ دقيقه واذا نشف تغسلونه وتحطون ماء ورد ..

٨- صابون اليدين من bath and body works ينعم اليدين وفيه حبيبات سكراب وريحته تجنن مره جميل وحبيته كان عليه تخفيض اخذته ب ٢٠ ريال بس ..

٩- شامبو للشعر يخفف النفشه وريحته عطريه وثابته حبيته و حبيت البلسم حقه لاكن خلص ولا لقيته مره ثانيه اخذته من بوتس ما اذكر كم سعره عايشه معه حالة عشق هالفتره فكيت الغطاء حقه لأنه يعكس كل شي ..

١٠- واخر شي بالقائمه الروائح العطريه للغرف من bath and body works طبعاً على الكهرب بعضهم اخذتهم تخفيض وبعضهم لا اساميهم صراحه ما اذكر و مو مكتوب عليهم جميلين وروائحهم مميزه ..

.......................................

وبكذا اكون خلصت مفضلاتي لهذا الشهر لاتنسون اللآيك والمنشن يدعموني ورأيكم يهمني قبل كل شي اذا حبيتوا اكتبوا لي تعليق باللي عجبكم ..

 my_1blog

French Toast..

السلآم عليكم وصبآحكم سعآده بإذن الله 

اليوم بحط لكم طريقة حلا وينفع فطور صباحي ..

(التوست الفرنسي)

سهل جدآً ولآ ياخذ وقت ،.

.....

المقادير :

٢/١ كأس حليب سائل 

بيضه 

سكر بني 

توست حسب الرغبه 

زيت او زبده

الطريقه :

ندهن المقلاة بالزبده او زيت ونضعها على النار ، نخلط البيضه مع الحليب في صحن ونغمس فيه التوست من كلا الجهتين ، نضع التوست على المقلاة وننتظر حتى تحمر قليلآ ونقلبها ، نبداء بوضع السكر البني عليها ونقلبها قليلآ على المقلاة ، ثم نقدمها بالصحن ونضع عليها عسل او نوتيلا او كريمة اللوتس ...

............

^وش رايكم فيني وانا اتكلم لغة عربيه ما انفع ههههههههههه المهم في حال ماحبيتوا تحطون السكر البني عادي وتقدرون تضيفون اي شي عليه غير الي كتبت فوق ممكن تحطون جلاكسي او زبدة الفول السوداني او اي شي ...

..................

وبالعافيه ...

...........................................

اذا حبيتوا الموضوع لآ تنسون اللآيك والمنشن يدعموني ويحمسوني استمر ..

 my_1blog

1000 Calorie Burning Circuit..

هنآ بيكون الجدول للتمارين اللي تحرق ١٠٠٠ سعره حرارية ..

طبعاً الجدول يحتوي على تمارين مقاومة او يطلق عليها ( القوة ) وتمارين هوائيه ،.

تمارين القوة :

 نستخدم فيه " ثقل " سواءً كان هذا الثقل أوزان أو وزن جسمنا أو حبل مقاومة

 منها (squats , plank , push up)..

تمارين الهوائيه (الكارديو) :

اي تمرين يرفع نبضات القلب وما يستخدم فيه اوزان

منها (المشي ، الهرولة ، السباحة ، الدراجة )..

الحين عرفنا الفرق بين الأثنين وبنبداء بالجدول طبعاً لكل تمرين جوله وبالجوله الوحده مكتوب كم تسوينها من مره ..

تحت كل تمرين الرابط حقه مكتوب اسمه..

الأول : jumping jacks *50 times

Jumping Jacks

الثاني : Running in place *2 minutes

Running in place

الثالث : push ups *15 times

push ups

الرابع : 2minutes Running in place

الخامس : squats *40 times

squats

السادس : 1minute Running in place

السابع : 25times jumping jacks

الثامن : 1minute Running in place

التاسع : 10times push ups

العاشر : 1minute Running in place

الحادي عشر : 20times squats

الثاني عشر : 1minute Running in place

الثالث عشر : 1minute plank 

plank

الرابع عشر : 1minute mountain climbers

mountain climbers

وبكذا تكونين احرقتي ١٠٠٠ سعره حراريه ..

إذا عجبكم الموضوع لآيك ومنشن للي محتاجين التمارين هذي وبكذا تكونوا تدعموني وتحمسوني استمر.

 my_1blog

كيف نحفت ؟

صباح الخير ..

الغالبيه منا نحب الجسم المتناسق ونحب الجمال ونبغى نطلع حلوين ، لآكن أحياناً الوزن الزائد يكون 

مخرب أشكالنا او مقلل من ثقتنا بأنفسنا ونحاول ننحف لآكن مانطلع بنتائج ونتسآئل ليه ؟!

اليوم بتكلم عن نفسي كيف نحفت ؟ وليه نحفت ؟ وش اللي شجعني ؟

آنا من صغري سويت عمليه آزلت فيها اللوز ومن بعدهآ سمنت حآولوا آهلي ينحفوني بس كآنت 

طريقتهم غلط كآنوا يهآوشوني وآنا آكل بمعنى وآنا بنص اكلي كانوا يقولون خلاص يكفي يلا قومي 

فا آضطر اروح من وراهم المطبخ واكل لين سمنت زياده ..

وكل محاولاتهم فشلت لآن الطريقه الي آتبعوها غلط..

كنت اتلقى ابشع الألفاظ اللي تتصورونها من الصغار والكبار فكانت كلها تخليني احط حيلي بالأكل ..

حتى الأن اتذكر كلمات جرحتني وهذا غير نظرات الشفقه لي ، صحيح ماكان وزني كبير بزياده لاكن كانت تعتبر سمنه.

حاولت اتبع انظمه غذائيه ومع اكثر من دكتوره اشتركت لاكن لا حياة لمن تنادي كل الي ينقص يرجع وفوقه زياده ،

كانت كل انظمتهم تقليديه وحرمان بطلت الانظمه حتى اني كرهت اغلب الآكلات من تكرارها ..

بعد مانجحت بثاني جامعه ورحت لثالث صحيت لنفسي وقلت ليه ما اغير بطريقة اكلي؟!

ليه ما اهتم بصحتي ؟!

واللي شجعني اكثر كان عندي اراده وكل الكلمات الي جرحتني هي اللي نَمتْ العزيمه الي عندي ..

اكثر موقف خلآني اقوي عزيمتي بالنحف كانت من اخت صديقتي بوقت ماكنا راجعين من الكليه 

وكنا طالبين غدا من ماك فاكنت اكل وكانت جنبي تاكل وكنت انا اول من انزل تخيلوا وش قالت ؟

التفتت علي وقالت يلا يلا بسرعه دخلي النص الباقي من اكلك عشان تنزلين !!

قالتها لي بأستهتار وبصوت عالي وضحكت ، طبعاً انا خنقتني العبره ونزلت النص الباقي وناظرتها 

وقلت ترا اذا انتي تستهزئين فهذا الشي مكتوب لي ومقدر من قبل لا اخلق وسكت ، مع انها هي بعد 

كانت سمينه لاكن !!!

بعدها بديت بنمط حياة صحي ..

قللت الكربوهيدرات قطعت الغازيات و قللت اكل الحلويات وكثرت شرب المويه ..

حطيت اخر وقت لي بالفطور الساعه ٧ اكون منتهيه ..

نظامي بالفطور احيانا اكل بيضتين مسلوقات مع ٢ توست اسمر ..

او اني اخذ توسته مع ملعقة peanut butter..

او توسته مع ملعقة مربى ..

او احيانا اسوي فرنش توست بالبيض ، او فرنش توست بالعسل ..

بعد ٣ ساعات من فطوري اخذ سناك اذا حسيت بجوع مثل خياره او شوية لوز ..

الغداء كنت اخذ نصف صدر دجاجه مع سلطه و احيانا اكتفي بأني اخذ خضار مسلوقه ..

وبعد ٤ ساعات او خمس ساعات اخذ فنجان قهوه مع قطعة دارك تشوكلت او ٣ تمرات ..

والعشاء اخذ زبادي مع الرمان او زبادي مع خيار ..

لو كنت حابه اكل ( ارز ، معكرونه ، معجنات ) 

اخذ لاكن بصحن صغير جدا والمعجنات اكتفي ب ٣ فقط 

وبعد اسبوعين يكون يوم الوجبه المفتوحه فأختار مطعم واطلب منه ..

معلومه : مافيه شي اسمه بحرم نفسي من الزيت والملح والسكر غلط لان الجسم يحتاجهم ولو حرمتي نفسك منهم جسمك بيحتبس وبيخزن الدهون لازم ناكل من كل شي لآكن بإعتدال ..

طبعا الأهم من هذا كنت ما ابي انحف بسرعه بالعكس كنت على الراحه وحابه اني اكل من كل شي لاكن بنسب بسيطه 

يعني اخذت سنه ونصف على ماوصلت وزني المثالي ..

السؤال الاكثر اهميه هو ماترهلتي ؟

لآ الحمدالله لآني بعد مانحفت ٣ كيلو بديت بآلتمارين سويت تمارين insanity للمدرب شون تي 

حملته بالتورنت ..

بعد ما انتهيت من التمارين هذي بديت افتح على اليوتيوب واسوي تمارين 

احتجت فقط للدمبلز واخذت ٢ كيلو 

وايضاً لحبل المقاومه 

حبل المقاومه تابعوا التمارين الي بالرابط الي تحت ..

اضغطوا هنا >>  تمارين حبل المقاومه ..

وبعد كذا اقول لكم الأراده ثم الأراده ثم الأراده اهتموا بأنفسكم وصحتكم مو عشآن أحد عشانكم أنتم ، أنتم بس اللي تحتآجون الأحترام لأنكم تقدرون تغيرون من حياتكم للأفضل ..

وفيه نقطه نسيتها انا كنت مسويه لي جدول كنت حاطته ٣ شهور وكل اسبوع اخذ الوزن واخر الشهر اشوف كم نحفت وبعد ٣ شهور اشوف كم كان وزني وكم صار وهذا اللي شجعني آكثر ..

والنهآيه اقول لكم إن شاء الله انكم تقدرون لأن انتم قدها و بتآصلون للهدف اللي أنتم تبغونه ..

YOU CAN DO IT

...

الأوزان الكبيره ممكن تنحف بسرعه بالبدايه وهذا مايعتبر دهون يعتبر سوائل لاكن الآوزان القريبه للمثالي يعني باقي على المثالي ١٥ او ١٠ كيلو بيآخذون وقت طويل على ماينزل الوزن لأنها تعتبر شحوم و كل جسم ونوعه فيه اجسام تنحف بسرعه وفيه اجسام لا وانا كان نوعي من الأجسام اللي تسمن بسرعه وتنحف ببطء عشآن كذآ حاولوا انكم تتحلون بآلصبر ..

...

اذا عجبكم الموضوع سوو لايك ومنشنوا اذآ احد محتاج موضوع نفس كذآ لانه يعتبر دعم لي ..

 my_1blog

weekly routine for hands ..

مساء الخير يآجميلآت هالمدونه بتكون عن الروتين الأسبوعي لليدين ...

اهم شي حركة القلفز ههههههههههه سسوو لها سكيب نرجع للموضوع بس حبيت اخليها تغير جوكم شوي ..

طبعا كلنا نحلم بيدين بيضاء وصافيه بدون سواد او آثار نفس كذا 

ماراح اكذب عليكم واقول بتصير يدينكم نفس يدينها وأعيشكم بأوهام لا لأن كل وحده منا لها صبغة ميلانين تختلف عن الثانيه لاكن اللي بقوله راح تكون يدينك صافيه ويظهر لونك الأساسي ..

هالروتين استخدمه مرتين بالأسبوع ..

اول شي ابداء فيه اسوي سكراب ليديني بسكراب القهوه اللي عطيتكم طريقته بأنستقرام 

احط شوي من Bio Oil واخذ شوي من السكراب واخلطهم جميع بعدين ازين يديني واركز على المفاصل اهم شي و أغسله انتبهوا لاتجرحون يدينكم  ..

الخطوة الثانية استخدم السكراب للجلد الي حوالين الأظافر 

اخليه دقيقتين واغسله ..

بعد ما اغسل يديني استخدم سيروم فيتامين سي من the body shop هذا الفيتامين كنت شاريته لوجهي لاكن تحسس منه وقررت استخدمه ليديني واستفيد منه احطه على الجلد الي حوالين الأظافر سعره 84 ريال ..

الحين جاء دور اليد كامله احط عليها لوشن فيتامين سي وتقدرون تحطون اي كريم ترتاحون له بس بشرط يكون مافيه عطر ممكن تستخدمون كريم QV والبس قلفز لمدة ربع ساعه ..

طبعآ أنا استخدم القلفز الي بأول صوره وبعد ربع ساعه اشيله ليه اسوي كذا لأن يدينا تحتاج ترطيب والترطيب هذا عميق عشآن كذا لازم ازيل الجلد الميت بآلسكراب وارطب ..

الحين نجي لحبيب الشعب واللي اعتقد إنه مافيه بيت يخلو منه الا وهو 

الفازلين إيه نعم الفازلين تحطونه على الأظافر والجلد الي حوالينه قبل النوم 

وبعدين تحطون فوقه اي كريم ترتاحون له او تقدرون تحطون نفس الفازلين على كامل اليد وتنامون واذا قمتوا 

اغسلوا يدينكم وحطو كريم مرطب بس مايكون فيه نسبة عطر ..

نصيحه: الفازلين لا تحطونه وتطلعون للشمس غلط لانه يسمر ..

طبعا السكراب والطريقه الي فوق تكون مرتين فقط بالأسبوع ، والفازلين قبل النوم والترطيب يوميا ..

اذا حبيتوا الموضوع سوو لآيك على الإنستقرام ومنشنوا احد محتاج هآلروتين ولآ تنسون إن اللايكات والمنشن يدعموني ويحفزوني اني استمر ..

 my_1blog

Derma Roller..

صباح \ مساء الخير جميعاً .. 

بسولف لكم شوي عن الديرما رولر واللي انتشرت بشكل واسع هالفتره ..

بعض الاشخاص يسألون وشو يعني ديرما رولر وإيش فآيدتها ؟

الديرما رولر هي عبارة عن تقنية جديده لعلاج مشاكل البشره من آثار ، شحوب لون الوجه ، التجاعيد ، الحفر الي تكون بالوجه ، الجروح ، التشققات وغيرها ..

الديرما رولر هي يد ولها عجله والعجله فيها إبر دقيقة جداً وكل آداة لها مقاس حسب مشكلة البشره ..

فكرة عملها !!

تعمل على التجريح البسيط واللي ينشط الدورة الدموية و يحسن من انتاج الكولاجين ..

طبعا انا استخدم مقاس 0.05mm للوجه اول استخدام حسيت بشوية ألم وثاني استخدام اقل شوي وبعد كذا تعودت وبديت ما احس بالألم بدايتي كنت استخدمها بالأسبوع مره وبعدين صرت بالأسبوع مرتين انا استخدمها لنضارة الوجه  ..

وعندي مقاس 2mm واللي للان متخوفه منه ولا استخدمتها و لا حتى شريت البنج بتصبر حتى اشتري البنج الموضعي واجربها إن شاء الله اخذتها للتشققات ..

طريقة استخدامها ..؟

اول شي تحطين الديرما رولر بمعقم لمدة ١٥ دقيقة استخدم بيتادين 

بالوقت الي تكونين حاطتها بالبيتادين احرصي تكونين نظفتي وجهك زين بالغسول الي يناسب بشرتك وجففتيها 

اذا خلصتي وطلعتيها من البيتادين اغسليها بمويه وحطي محلول معقم قوي انا صراحه ما احط لاني احس إن البيتادين يكفي ابدا بخطوط عموديه بكل مكان امررها 10 مرات مع ضغط خفيف واذا انتهيت من كل الوجه اعيد مره ثانيه لاكن بخطوط افقيه 10 مرات واذا انتهيت ارجع احط الديرما رولر بالبيتادين لاكن جديد ما احطه بنفس الي قبل لاا خطاء واغسل وجهي بمويه بارده واجففه واحط سيروم فيتامينات ..

السيروم هذا الي وصفته لي الدكتوره لاكن تقدرون تحطون السيروم الي ترتاحون له ..

. . .

طبعا ً الأداة هذي أُثبتت فاعليتها على كثير من الأشخاص والحين بخليكم مع بعض صور الي استخدموا الديرما رولر وتحسنت بشراتهم ...

برضو تقدرون تبحثون عن نتائج الديرما رولر وتشوفون ..

او تكتبون Derma Roller Results..

وإن شاء الله يكون هالموضوع عجبكم ..

my_1blog

summer nail polish colors...

بسم الله الرحمن الرحيم 

صباح الخير على الجميع ..

اليوم بإذن الله بتكلم عن الوان المناكير لهذا الصيف ..

المعروف عنا يالبنات نحب المناكير ونحب نبرز يدينا بالألوان جزء منا يفضل الغوامق والجزء الآخر يفضل الفواتح فيه كلام انتشر بالفتره الأخيره قالوا انه الاظافر القصيره تناسبها الفواتح فقط والطويله تناسبها الغوامق اكثر وبرضوا قالوا الوان البشرات وحددوا لكل بشره لون لاكن أنا ضد الكلام هذا لانه من الطبيعي ان كل لون له تدرج وكل تدرج يناسب نوع من الأظافر و لون البشره ...

طبعا الألوان الدارجه لهذا الصيف فيه منها الفاتح وفيه منها الغامق ..

وهنا بعرض لكم بعض الألوان ..

اول لون اسمه { marshmallow } من Max Factor رقمه 125..

اللون الثاني اسمه { power Red } من NYX رقمه 134..

اللون الثالث اسمه { Lilacism } من essie رقمه 705..

اللون الرابع اسمه { candy rose } من MAX Factor رقمه 50..

اللون الخامس اسمه { cute coral } من MAX Factor رقمه 70..

اللون السادس اسمه { Cappuccino } من MAX Factor رقمه 26..

اللون السابع اسمه { taupe classy } من BOURJOIS رقمه 4..

اللون الثامن اسمه { aquamarine } من MAX Factor رقمه 175..

اللون التاسع اسمه { raspberry blush } من MAX Factor رقمه 160..

وفيه الوان كثيره موجوده بالجدول الي فوق بس اكتفيت بإني انزل هذي الألوان ..

THE END